गर्मी बढेपछि छिन छिनमा बत्ती आउने जाने गरेकाले सेवाग्राहीले थप कष्ट भोग्नु परेको छ ।
आधिकारिक रूपमा अहिले लोडसेडिङ नरहेको तथा दिउँसोमा जसोतसो विद्युत् आए पनि रातभरि बिजुली नआउने हुँदा उपभोक्ताले थप कष्ट भोग्नु परिरहेको कलैया उप–महानगरपालिका–१ का सत्यप्रसाद श्रेष्ठले बताए ।
गर्मीयाममा विद्युत् खपत बढी हुने गरेको तथा ३२ प्रतिशतसम्म विद्युत् चोरीका कारण अघोषित लोडसेडिङ गरिँदै आएको नेपाल विद्युत् प्राधिकरण वितरण केन्द्र कलैयाका प्रमुख ऋषिकुमार वरनवालले बताए ।
अहिले विहारको रक्सौलबाट १३२ को लाइनबाट करिब दुई सय एमबिए विद्युत् वीरगन्जमा दिनहुँ आउने गरेको छ । त्यहाँबाट आएको विद्युत् वीरगन्ज, कलैया, परवानीपुर र परवानीपुरबाट पोखरिया क्षेत्रमा वितरण हुने गरेको छ । त्यस क्षेत्रमा पनि ओभरलोड हुने गरेका कारण सबै क्षेत्रको दुई÷तीन घण्टा पालैपालो विद्युत् कटौती गरी आपूर्ति पूरा गरिँदै आएको प्रमुख वरनवालले जानकारी दिए।
गण्डक नहरभन्दा दक्षिणको क्षेत्रमा अत्यधिक विद्युत् चोरी हुँदै आएको छ । जिल्लाको अन्य फिडरभन्दा शीतलपुर एरिया थेग्न नसक्ने अवस्थामा छ । लाइन आउनेबित्तिकै खेतमा सिँचाइ गर्न बसेकाहरू एकै पटक मोटर जडान गरेपछि प्राधिकरणको उपकरण बढी ट्रिप हुने गरेको उनले बताए ।
“हाम्रो उपकरणको कुल क्षमता २७० को छ । त्यसको पावर बढाएपछि, ठाउँ ठाउँमा तार सर्ट भई चुँडिने अन्य उपकरण जल्नेलगायतका समस्या उत्पन्न हुन थाल्छ । त्यसैले थप एउटा सेक्सन बनाउन लाग्दा त्यहाँका स्थानीय विरोधका साथै हस्तक्षेप गर्दै आएका छन् । एउटा अर्को विकल्प निर्माण हुँदै छ ।
पिलुवा कलैया विद्युत् सप्लाई, त्यसमा पनि ठाउँ ठाउँमा विवाद हुँदै आएको छ । त्यस एरियामा काम गरिरहेका कर्मचारीको मोबाइलसमेत स्थानीयले खोसेर अवरोध गरेपछि हामी पनि चुप लागेर बसेका हौँ,” प्रमुख वरनवालले भने ।
अघोषित लोडसेडिङ कम गर्न १३७ जना व्यक्तिसहित ९७ वटा उपकरण पक्राउ गरी २५ लाख आठ हजार ५७७ रुपियाँ दण्ड जरिबाना गरिएको छ । स्थानीय पालिकाले टोल टोल र कृषिमा सिँचाइ गर्न खेत खेतमा समेत विद्युत् जडान गरिदिएकाले मिटरबाट विद्युत् बाइपास गर्नेलाई पक्राउ गरी छ लाख ५३ हजार ४४ रुपियाँ असुल गरिएको अनियमितता सुधार फाँटका नायब सुब्बा राहुल मण्डलले बताए ।
यसैगरी, विद्युत् चोरी गर्ने १३७ मानिसबाट १३ लाख १३ हजार ७२३ रुपियाँ र ९७ वटा खेतबाट उपकरण (मोटर) नियन्त्रणमा लिई पाँच लाख ५१ हजार ८०९ रुपियाँ दण्ड जरिबाना गरिएको छ । हालका दिनसम्म यस वितरण केन्द्रबाट करिब ६६ हजार सेवाग्राहीले सेवा लिँदै आएको प्रशासन फाँट प्रमुख जलन्धरप्रसाद गोढले जानकारी दिए ।
