हजका क्रममा ज्यान गुमाउनेको संख्या एक हजार नाघ्यो

अन्तर्राष्ट्रिय

गृहपृष्ठ
अन्तर्राष्ट्रिय

हज़ हजका क्रममा ज्यान गुमाउनेको संख्या एक हजार नाघ्यो अधिकांशको मृत्युको कारण यस वर्षको चरम गर्मी

Parsa Online शुक्रबार, असार ७, २०८१

यस वर्षको हजमा ज्यान गुमाउनेको संख्या एक हजार नाघेको एएफपीले बिहीबार जनाएको छ । अधिकांशको मृत्युको कारण यस वर्षको चरम गर्मी रहेको अधिकारीले बताएका छन् ।

हजयात्रामा मृत्यु हुनेको पछिल्लो तथ्यांकमा इजिप्टका सबैभन्दा धेरै तीर्थालु रहेको एक कूटनीतिज्ञले बताए । हज तीर्थयात्राका क्रममा लगभग १० देशका एक हजार ८१ जनाको मृत्यु भएको रिपोर्ट गरिएको छ । इस्लामिक क्यालेन्डरअनुसार निर्धारित समयमा गरिने हज यस वर्ष साउदीको प्रचण्ड गर्मीको समयमा परेकाले धेरैले कठिनाइ अनुभव गरेका छन् ।

साउदी अरबको राष्ट्रिय मौसम विज्ञान केन्द्रले गत हप्ताको सुरुमा मक्कास्थित ग्रान्ड मस्जिदमा ५१.८ डिग्री सेल्सियसको उच्च तापक्रम मापन गरेको थियो । गत महिना प्रकाशित एक साउदी अध्ययनअनुसार यस क्षेत्रको तापक्रम प्रत्येक दशकमा शून्य दशमलव चार डिग्री सेल्सियसले बढिरहेको छ ।

अधिकारीहरूले अनुमतिविना प्रवेश गर्नेको संख्या धेरै भएपछि तीर्थयात्रीको व्यवस्थापनमा समस्या आउँदा यो वर्ष गर्मीबाट मर्नेको संख्या उच्च भएको बताएका छन् । प्रत्येक वर्ष हजारौँ हज तीर्थयात्री वैध अनुमतिका लागि महँगो शुल्क तिर्न नसक्दा अनियमित माध्यममार्फत हजयात्रा गर्ने प्रयास गर्छन् । इजिप्टका कूटनीतिज्ञले अत्यधिक गर्मीका कारण उच्च रक्तचाप र अन्य समस्याबाट तीर्थयात्रीको मृत्यु भएको बताएका छन् ।

इजिप्टबाहेक, मलेसिया, पाकिस्तान, भारत, जोर्डन, इन्डोनेसिया, इरान, सेनेगल, ट्युनिसिया र इराकको स्वायत्त कुर्दिस्तान प्रशासनले पनि आफ्नो नागरिकको मृत्यु भएको रिपोर्ट गरेका छन् । मृतकका परिवार र आफन्तहरूले अझै बेपत्ता भएका तीर्थयात्रीको खोजी गरिरहेका छन् ।

प्रकाशित मिति: शुक्रबार, असार ७, २०८१ ०८:४५

प्रतिक्रिया दिनुहोस्