वीरगञ्ज लगायत देशका धेरै ठाउँमा रातभर झरी, नदी र खोलामा बाढी

समाचार

गृहपृष्ठ
समाचार

मौषम वीरगञ्ज लगायत देशका धेरै ठाउँमा रातभर झरी, नदी र खोलामा बाढी

Parsa Online शनिबार, असार २२, २०८१

फाइल तस्बिर

वीरगञ्ज, कलैया , गौर लगायत काठमाण्डौ उपत्यकासहित देशका धेरै ठाउँमा रातभर झरी परेको छ । पूर्वदेखि पश्चिमसम्म नै धेरै ठाउँमा पानी परेको छ । लगातार र ठूलो पानी परेका ठाउँका नदी, खोलामा बाढी आएको छ ।

बागमती नदीमा पनि पानीको सतहले खतराको तह पार गरेको छ । यस्तै, कालीगण्डकी र नारायणी नदीमा जल सतहले खतराको तह पार गरेको छ ।

पछिल्लो ६ घण्टामा सबैभन्दा धेरै पाल्पा, अर्घाखाँची र स्याङ्जामा एकसय मिलिमिटरभन्दा धेरै वर्षा भएको छ ।

तिनाउ नदी, पश्चिम राप्ती, कोइली नदी, डुम्रे खोला, बडिगाड, बबई नदी लगायत क्षेत्र भइ बहने अरू स–साना नदीमा आकस्मिक बाढीको जोखिम रहेकाले तटीय क्षेत्र तथा डुबान भइरहने होचा ठाउँमा बस्नेलाई सावधानी अपनाउन बाढी पूर्वानुमान महाशाखाले आग्रह गरेको छ ।

अर्घाखाँचीको सन्धिखर्क, गुल्मीको बडिगाड, स्याङजाको मालुङ्गा वर्षामापन केन्द्र र आसपासको क्षेत्रमा मध्यमदेखि ठूलो वर्षा मापन भएको र ती क्षेत्र भइ बहने ससाना नदीमा आकस्मिक बाढीको जोखिम रहेकाले तटीय क्षेत्र तथा डुबान भइरहने होचा ठाउँमा रहनेलाई आज बिहानसम्मै उच्च सतर्कता अपनाउन महाशाखाले भनेको छ ।

यस्तै पाल्पाको कुमलगाउँ, गण्डाकोट, जल्पा, अर्चले, बल्ड्याङ्गढी र आसपासको क्षेत्रमा पनि मध्यमदेखि ठूलो वर्षा भएकाले निस्ती खोला लगायत ससाना नदीमा आकश्मिक बाढीको जोखिम रहेकाले तटीय क्षेत्रमा बस्नेलाई आज बिहानसम्मै उच्च सतर्कता अपनाउन महाशाखाले अनुरोध गरेको छ ।

महाशाखाले भोलिसम्म देशका विभिन्न ठाउँमा बाढीको जोखिम रहेको भन्दै उच्च सतर्कता अपनाउन आग्रह गरेको छ । आज देशभरका धेरै स–साना नदी बहाव बढ्ने तथा गण्डकी, लुम्बिनी, कर्णाली र सुदूरपश्चिम प्रदेश भई बहने केही स–साना नदीमा आकस्मिक बाढी आउन सक्ने महाशाखाले जनाएको छ ।

प्रकाशित मिति: शनिबार, असार २२, २०८१ ०७:३१

प्रतिक्रिया दिनुहोस्