महोत्तरीको रमौलमा एक नवविवाहित युवतीको शंकास्पद मृत्यु

समाज

गृहपृष्ठ
समाज

महोत्तरीको रमौलमा एक नवविवाहित युवतीको शंकास्पद मृत्यु

Parsa Online शुक्रबार, भदौ ७, २०८१

महोत्तरीको रमौलमा एक नवविवाहित युवतीको शंकास्पद मृत्यु भएको छ । मृत्यु हुनेमा महोत्तरीको जलेश्वर नगरपालिका–८ स्थित रमौलकी २० वर्षीया रिना देवी राय रहेकी छन् ।

रिनाको मंगलबार मध्यरात १ बजे मृत्यु भएको महोत्तरी प्रहरीले जनाएको छ । विवाह भएको केही महिनापछि दाइजोको निहुँमा पति रोहनकुमार राउतसहितका परिवारले हत्या गरेको माइतीपक्षले दाबी गर्दै प्रहरीमा जाहेरीसमेत दिएको छ । महोत्तरी प्रहरीका प्रहरी नायब उपरीक्षक सन्तुलाल जैसवारले पति रोहनले मध्यराति खाना खाएरंँगै सुतेको, अचानक बिरामी हुँदा प्रादेशिक अस्पताल जलेश्वरमा उपचारका लागि लगेको र त्यहाँ मृत्यु भएपछि शव घर ल्याइएको प्रहरीलाई प्रारम्भिक बयान दिएको जनाए ।

माइतीपक्षले आफूहरू पुग्दा रिनाको मुखबाट रगत बगेको जस्तो र घाँटीमा निलडाम पनि देखिएकोले हत्या भएको दाबी गरेको छ । छोरीको हत्या भएको दाबी गर्दै माइत पक्षले पति रोहनसहित परिवारका चार सदस्यविरुद्ध प्रहरीमा बुधबार कर्तव्यज्यान मुद्दामा जाहेरी दिएको जनाइएको छ ।

ससुरा ५२ वर्षीय बृज मोहन राउत, सासु ४८ वर्षीया मनतोर देवी र देवर २५ वर्षीय ओमकुमारविरुद्ध जाहेरी जिल्ला प्रहरी कार्यालय महोत्तरीमा जाहेरी दिएको छ । रिना मंगलबार मात्रै माइतबाट घर फर्केकी थिइन् । रिनाको शव परीक्षणको लागि प्रादेशिक अस्पताल जनकपुरमा हुनेछ । पोस्टमार्टमपछि के कति कारणले मृत्यु भएको खुल्ने प्रहरी नायब उपरीक्षक जैसवारको भनाइ छ ।

घटना सामान्य भएको बताउँदै प्रहरीले भने कसैलाई पनि पक्राउ गरेको छैन । धनुषाको हँसपुर नगरपालिका–६ स्थित सोनिगामाकी गत वैशाख १९ मा सामाजिक परम्पराअनुसार रोहनसँग रिनाको विवाह भएको थियो । माइती पक्षले लत्ता, कपडा, भाडाकुँडा, फर्निचर, सुन, चाँदीलगायतका गरगहना तथा नगद गरी १५ लाखभन्दा बढी रकम खर्च गरेको रिनाको बुबा नवल रायले बताए ।

प्रकाशित मिति: शुक्रबार, भदौ ७, २०८१ ०८:३९

प्रतिक्रिया दिनुहोस्