काठमाडौं । स्वस्थ रहनको लागि सही समयमा खाना अत्यन्तै आवश्यक छ । ब्रेकफास्ट, लन्च र डिनरले हाम्रो स्वास्थ्यलाई स्वस्थ बनाउन महत्त्वपूर्ण भूमिका खेल्छ । हामी कहिले र के खान्छौँ भन्ने कुराले स्वास्थ्यमा गहिरो प्रभाव पार्छ ।
विशेष गरी रातको खानाले स्वास्थ्यमा प्रत्यक्ष असर पार्छ । खानासँगै तपाईं डिनरपछि के गर्नुहुन्छ भन्ने कुरा अझ बढी महत्त्वपूर्ण हुन्छ । सम्पूर्ण पोषणले भरिएको डिनर खाएपछि तुरुन्तै सुत्न जानुहुन्छ भने यसले तपाईंको तौल घटाउने यात्रालाई पनि कठिन बनाउँछ ।
यसका साथै यसले अन्य धेरै समस्याहरू पनि निम्त्याउन सक्छ । त्यसैले खानासँगै डिनरपछि गरिने गतिविधिहरू धेरै महत्त्वपूर्ण हुन्छन्, किनकि यसले शरीरको मेटाबोलिज्म र पाचन शक्ति बढाउँछ, तौल घटाउन मद्दत गर्छ र तपाईंलाई सधैँ स्वस्थ रहन मद्दत गर्छ ।
यस अवस्थामा आज हामी तपाईंलाई केही यस्ता बानीहरूको बारेमा बताउनेछौँ, जसलाई डिनरपछि गर्ने हो भने तपाईं सधैँ स्वस्थ रहनुहुनेछ ।
हिँड्नुहोस्
डिनरपछि कम्तीमा १० मिनेट हिँड्नुपर्छ । यसले रक्तसञ्चारलाई सही बनाउँछ, पाचन शक्ति बढाउँछ, क्यालोरी बर्न गर्छ, इन्सुलिन स्तर कम गर्छ, मेटाबोलिज्म बूस्ट गर्छ र शरीरमा बोसो जम्नबाट रोक्छ । यसले पेट फुल्ने समस्यालाई पनि हटाउँछ । साथै आफ्ना प्रियजनहरूसँग हिँड्दा दिनभरिका कुरा शेयर गर्न सकिन्छ, जसले मानसिक थकान हटाउँछ ।
मनतातो पानी पिउनुहोस्
बेलुकीको खाना खाएको ३० मिनेटपछि मनतातो पानी पिउनुहोस् । यसले खानालाई पचाउन र पोषण अवशोषण गर्न मद्दत गर्छ । यसले पाचन प्रक्रिया सुचारु रूपमा सञ्चालन गर्न मद्दत गर्छ ।
ब्रस गर्नुहोस्
बेलुकीको खाना खाएको आधा घण्टा पछि दाँत ब्रस गर्नुहोस् र त्यसपछि केही पनि नखानुहोस् । यसले क्याभिटीको खतरा टार्छ र मुखको स्वास्थ्य राम्रो बनाउँछ ।
आरामदायक कपडा लगाउनुहोस्
सफा–सुग्घर खुल्ला कपडा लगाउनुहोस् । टाइट कपडाले एसिडिटी वा हार्टबर्न उत्पन्न गर्न सक्छ र सुत्न असहज महसुस गराउँछ ।
फलफूलको सेवन नगर्नुहोस्
केही मानिसहरूलाई लाग्छ कि फलहरू सधैँ स्वस्थ हुन्छन्, तर वास्तविकता यो हो कि बेलुकीको खानापछि फलहरू खानु हुँदैन । यसले पाचनलाई प्रभावित गर्छ र तिनमा भएको सुगरको मात्राले चिनीको स्तर बढाउन सक्छ ।
