वीरगन्ज र आसपास क्षेत्रमा खानेपानीको समस्या समाधान गर्छौं: मन्त्री यादव

राजनीति

गृहपृष्ठ
राजनीति

वीरगन्ज र आसपास क्षेत्रमा खानेपानीको समस्या समाधान गर्छौं: मन्त्री यादव

Parsa Online आइतबार, भदौ २३, २०८१

खानेपानीमन्त्री प्रदीप यादवले वीरगन्ज र आसपासका क्षेत्रमा देखिएको खानेपानीको समस्या समाधान गर्न सरकार प्रतिबद्ध रहेको बताएका छन्।

जनता समाजवादी पार्टी (जसपा) वीरगन्ज महानगरपालिका–१६ एकाइ समितिले आज (आइतबार) यहाँ आयोजना गरेको कार्यकर्ता भेटघाट कार्यक्रममा मन्त्री यादवले जनतालाई स्वच्छ खानेपानी पुर्‍याउनु सरकारको पहिलो प्राथमिकता रहेको उल्लेख गरे।

विद्यमान खानेपानीको समस्या दीर्घकालीन रुपमा समाधान गर्न मन्त्रालयबाट प्राथमिकताका साथ योजना अघि सारेको उनले जनाए। “पानीको समस्याले जनतालाई सास्ती भइरहेको छ, यो विषयमा सरकार गम्भीर छ, दीर्घकालीन समाधानका लागि योजना बनाइरहेका छौं”, मन्त्री यादवले भने, “हामीले यो विषयमा ध्यान केन्द्रित गरेका छौ‌ं र शीघ्र समाधान हुनेमा प्रतिबद्ध छौं।”

जनताको आशा र अपेक्षालाई सम्बोधन गर्न आगामी दिनमा थप प्रभावकारी योजनाहरु अघि बढाइने मन्त्री यादवको भनाइ छ।

जसपाका उपमहासचिवसमेत रहेका मन्त्री यादवले पार्टीको नीतिगत निर्देशनका आधारमा जनताको सेवा र कल्याणमा आफू निरन्तर सक्रिय रहेको सुनाए।

जसपाले आगामी चुनावमा जनताको समर्थन पाउन सक्नेगरी सङ्गठनलाई सुदृढ बनाइने उनको भनाइ छ।

कार्यक्रममा वीरगन्ज महानगरपालिकाका नगरप्रमुख राजेशमान सिंहले स्थानीय विकास र जनसेवामा आफ्नो पूर्ण समर्पण रहेको बताए। उनले भने, “वीरगञ्जको समृद्धि र विकासका लागि हामी सबै कर्मचारी निरन्तर क्रियाशील छौं। जनताको समस्या समाधान गर्नु हाम्रो पहिलो प्राथमिकता हो।”

नगरप्रमुख सिंहले पार्टीको साझा उद्देश्यलाई साकार बनाउन कार्यकर्ता सबै एकतामा बाँधिएर जनताका आवश्यकतामा केन्द्रित भई काम गर्नुपर्नेमा जोड दिए।

प्रकाशित मिति: आइतबार, भदौ २३, २०८१ १६:१२

प्रतिक्रिया दिनुहोस्