रानीघाट पुलबाट किशोरीले हाम फालिन, बाढीको तेज बहावले बेपत्ता

समाचार

गृहपृष्ठ
समाचार

वीरगञ्ज रानीघाट पुलबाट किशोरीले हाम फालिन, बाढीको तेज बहावले बेपत्ता

Parsa Online आइतबार, असोज १३, २०८१

वीरगञ्ज । वीरगञ्जको रानीघाट पुलबाट आज (आइतबार) बिहान एक किशोरीले सिर्सिया नदीमा हाम फालेको खबर प्राप्त भएको छ ।

प्रत्यक्षदर्शीहरूका अनुसार, बिहान करिब सवा ९ बजेतिर करिब १५/१६ वर्षकी एक किशोरीले रानीघाटबाट रामगढवा जाने सडकमा रहेको पुलबाट नदीमा हाम फालेकी थिइन् ।

नदीमा केही दिनदेखि परेको अविरल वर्षाका कारण आएको बाढीले ती किशोरीलाई तुरुन्तै बगाएको छ, जसका कारण उनी अहिले बेपत्ता छिन् ।

स्थानीय युवा राजकुमार सर्राफले घटनापछि तत्काल प्रहरीलाई खबर गरिएको र खोजी कार्यका लागि प्रहरी टोली घटनास्थलमा पुगेको जानकारी दिए । किशोरीलाई नदीले बगाएपछि उनको पहिचान अझै खुल्न सकेको छैन, जसले घटनालाई अझै गम्भीर बनाएको छ ।

जिल्ला प्रहरी कार्यालय पर्साका प्रवक्ता, प्रहरी नायब उपरीक्षक (डिएसपी) दीपक भारतीले पनि पुलबाट एक किशोरीले हाम फालेको सूचना प्राप्त भएको पुष्टि गर्दै घटनास्थलमा प्रहरी परिचालित भएको र खोजी कार्य जारी रहेको बताए । उनले नदीमा आएको बाढीका कारण खोजी कार्य चुनौतीपूर्ण बनेको पनि उल्लेख गरे ।

अविरल वर्षाले नदीमा बाढीको अवस्था खतरनाक बनेको हुँदा खोजी कार्यमा स्थानीय बासिन्दा र सुरक्षाकर्मीलाई कठिनाइ भइरहेको छ । सम्बन्धित निकायले नदीको बाढीको बहावलाई ध्यानमा राख्दै खोजी कार्यलाई तीव्र बनाउनुपर्ने आवश्यकता औँल्याएको छ ।

अहिलेसम्म ती किशोरीको उद्धार वा कुनै सुराकी भेटिएको छैन । नदीको बहाव निकै तेज रहेको र खोजी कार्यलाई निरन्तरता दिइरहेको प्रहरी स्रोतले बताएको छ ।

प्रकाशित मिति: आइतबार, असोज १३, २०८१ ११:४७

प्रतिक्रिया दिनुहोस्