छविलाल जोशीलाई गैरकानुनी थुनामा राखिएको दाबी गर्दै सर्वोच्चमा निवेदन

राजनीति

गृहपृष्ठ
राजनीति

अदालत छविलाल जोशीलाई गैरकानुनी थुनामा राखिएको दाबी गर्दै सर्वोच्चमा निवेदन

Parsa Online सोमबार, असोज १४, २०८१

काठमाडौँ । गोर्खा मिडियामा सहकारीको पैसा अपचलन गरेको अभियोगमा पक्राउ परेका पूर्व डीआईजी छविलाल जोशीलाई गैरकानुनी थुनामा राखेको भन्दै सर्वोच्चमा बन्दी प्रत्यक्षीकरणको निवेदन दर्ता भएको छ।

जोशीका तर्फबाट रोचक जोशीले थुनामुक्त माग गर्दै निवेदन दर्ता गरेका हुन् । आइतबार सर्वोच्चमा निवेदन दर्ता भएको थियो भने सोमबार पेसी तोकिएको छ। आज न्यायाधीशमा तिलप्रसाद श्रेष्ठको इजलासमा पेसी तोकिएको छ।

पोखराको सूर्यदर्शन सहकारी संस्थाको रकम अपचलन मुद्दामा अनुसन्धानका लागि पक्राउ गरिएको थियो । पोखरामा उनको बयान सकिएको छ भने थप अनुसन्धान भइरहेको छ।

संसदीय छानबिन विशेष समितिले दिएको प्रतिवेदनमा जोशीलाई पनि कारबाही गर्न सिफारिस गरिएको थियो। प्रतिनिधिसभामा पेस भएको प्रतिवेदन सभामुख देवराज घिमिरेले कार्यान्वयनका लागि सरकारलाई पठाउन निर्देशन दिएका थिए।

असोज ४ गतेको मन्त्रिपरिषद् बैठकले सहकारी छानबिन प्रतिवेदन कार्यान्वयन गर्ने निर्णय गरेको थियो । प्रतिवेदन गृह मन्त्रालयमा पठाएको थियो । गृहमा पुगे लगत्तै पूर्वडीआईजी जोशीलाई पक्राउ गरिएको हो।

उनी गोरखा मिडिया नेटवर्कका सञ्चालक हुन्। पोखराको सूर्यदर्शन सहकारीको बचत रकम गोरखा मिडियामा लगानी गरेको पाइएको थियो।

यसमा जोशीसँगै पूर्व गृहमन्त्री एवं राष्ट्रिय स्वतन्त्र पार्टीका सभापति रवि लामिछाने र जीवी राईलाई पनि कारबाही गर्न सिफारिस गरिएको छ। राई गोरखा मिडियाका अध्यक्ष हुन् भने लामिछाने त्यति वेला प्रबन्ध निर्देशक थिए।

प्रकाशित मिति: सोमबार, असोज १४, २०८१ १२:०८

प्रतिक्रिया दिनुहोस्