बसको ठक्करबाट बालिकाको मृत्यु भएपछि तनावग्रस्त बनेको खनार क्षेत्र सामान्य अवस्थामा फर्किँदै

समाचार

गृहपृष्ठ
समाचार

बसको ठक्करबाट बालिकाको मृत्यु भएपछि तनावग्रस्त बनेको खनार क्षेत्र सामान्य अवस्थामा फर्किँदै

Parsa Online सोमबार, मंसिर ३, २०८१

बिराटनगर- यात्रुवहाक बसले ठक्कर दिँदा बालिकाको मृत्यु भएपछि उग्ररुप लिएको सुनसरीको खनार बिहानबाट शान्त बनेको छ ।

आइतबार अपरान्ह इटहरीबाट विराटनगर जाँदै गरेको मे १ ख ४५७४ नम्बरको बसले साइकलमा सवार १३ वर्षीया सम्झना यादवको मृत्यु भएपछि खनार अबेर रातिसम्म तनावग्रस्त बनेको थियो ।

अपरान्ह करिब सवा ४ बजे भएको दुर्घटनासँगै खनार करिब १० बजेसम्म अशान्त बन्यो । सुनसरी प्रहरीका प्रवक्ता प्रहरी नायब उपरिक्षक रामप्रसाद तिमल्सिनाका अनुसार ठूलो संख्यामा रहेको आक्रोशित भीडले निरन्तर करिब ६ घण्टा ढुंगामुडा र आगजनी गरेको थियो ।

स्थितिलाई नियन्त्रणमा लिन प्रहरीले लाठी चार्ज, अश्रुग्यास प्रहार र हवाई फायरसमेत गर्नु परेको थियो । प्रहरीले २० राउण्ड हवाई फायर र ३० सेल अश्रुग्यास प्रहार गरेको थियो । हाल राजमार्गको अवस्था सामान्य रहेको जनाउँदै प्रहरीले यातायात सेवा सुरु भएको जनाएको छ ।

घटनापछि सुनसरीको जिल्ला सुरक्षा समितिको आकस्मिक बैठकले प्रहरी निरिक्षक महेन्द्र पराजुलीको नेतृत्वमा ५ सदस्यीय छानविन समिति समेत गठन गरेको छ । प्रहरीका अनुसार आक्रोशित भीडमा ढुंगामुढा लागेर प्रहरी उपरिक्षक सुमनकुमार तिमिल्सिना, सशस्त्र प्रहरीका उपरिक्षक समानन्द बज्राचार्यसहित २१ जना घाइते भएकाछन् ।

कक्षा ९ मा अध्ययनरत बालिका यादवको घटनास्थलमा मृत्यु भएपछि हुइँकिएको बसलाई आक्रोशित भीडले खनार चौक नजिक सुनसरी मोरङ सिचाइ योजनाको पुलमा आगो लगाएका थिए ।

त्यसपछि उग्र बनेको भीडले तनावग्रस्त बनेको खनारको स्थिति नियन्त्रणमा सशस्त्र प्रहरी, नेपाल प्रहरीको ठूलो टोली परिचालन भएको थियो । सुनसरी प्रहरीले आगलागीका क्रममा बसमा रहेका यात्रु निस्किएका थिए । सोही क्रममा प्रहरीले विराटनगर १३ का बसचालक अमित श्रेष्ठलाई नियन्त्रणमा लिएको छ ।

प्रकाशित मिति: सोमबार, मंसिर ३, २०८१ १०:२७

प्रतिक्रिया दिनुहोस्