रविलाई अदालत उपस्थित गराइँदै, पाँचौँपल्ट म्याद माग्ने प्रहरीको तयारी

राजनीति

गृहपृष्ठ
राजनीति

सहकारी ठगी रकम रविलाई अदालत उपस्थित गराइँदै, पाँचौँपल्ट म्याद माग्ने प्रहरीको तयारी

Parsa Online आइतबार, मंसिर ९, २०८१

सहकारी ठगी, संगठित अपराध र सम्पत्ति शुद्धीकरण मुद्दाको अनुसन्धानका लागि हिरासतमा रहेका राष्ट्रिय स्वतन्त्र पार्टी (रास्वपा) का सभापति रवि लामिछानेलाई प्रहरीले आज आइतबार जिल्ला अदालत कास्कीमा उपस्थित गराउँदै छ । उनीमाथिको अनुसन्धान नसकिएको भन्दै प्रहरीले पाँचौँपल्ट अदालतसँग थप म्याद माग्न सक्छ ।

यसअघि २५ कात्तिकमा पाएको १३ दिनको म्याद शनिबार सकिएसँगै प्रहरीले पूर्वगृहमन्त्री लामिछानेलाई पुनः अदालत पेस गर्न लागेको हो । २ कात्तिकमा काठमाडौंस्थित पार्टी केन्द्रीय कार्यालयबाट पक्राउ परेका लामिछानेमाथि पोखरा, बुटवल, चितवन र काठमाडौंका चार सहकारीको बचत ठगी आरोपमा प्रहरीले अनुसन्धान गरिरहेको छ ।

यसअघि उनलाई पोखराबाटै बुटवल पु¥याएर त्यहाँको सुप्रिम बचत तथा ऋण सहकारी संस्थाको बचत अपचलन प्रकरणमा बयान लिइएको थियो । उनीविरुद्ध चितवन र काठमाडौंमा पनि पक्राउ पुर्जी जारी भइसकेको छ । केही दिनभित्रै उनलाई प्रहरीले काठमाडौं ल्याएर बयान लिन सक्छ ।

सहकारी संस्थाको बचत रकम दुरुपयोग सम्बन्धमा संसदीय छानबिन विशेष समितिले लामिछानेसहित गोरखा मिडियाका तत्कालीन सञ्चालकहरू जीबी राई र छविलाल जोशीलाई कारबाही गर्न सिफारिस गरेको थियो । त्यो समितिलाई मानेरै रास्वपाले आफ्नो तर्फबाट सांसद शिशिर खनाललाई सदस्यका रूपमा सिफारिस गरेको थियो । ९९ दिन लगाएर समितिले तयार पारेको प्रतिवेदन निचोडमा खनाल स्वयम्ले पनि हस्ताक्षर गरेका छन् ।

विभिन्न ५ सहकारीबाट गैरकानुनी ढंगले गोरखा मिडियामा भित्र्याइएको ६५ करोडभन्दा बढी रकम जीबी, रवि र छविको संयुक्त खातामार्फत खर्च भएकाले उनीहरू कारबाहीको भागिदार रहेको समितिको निष्कर्ष थियो । सोही सिफारिसको आधारमा अजोज ५ गते छवि र कात्तिक २ गते रवि पक्राउ परेका थिए । उनीहरूविरुद्ध सहकारी ठगीसँगै संगठित अपराध र सम्पत्ति शुद्धीकरण मुद्दामा अनुसन्धान भइरहेको प्रहरीले बताएको छ ।

रास्वपाले भने सभापति पक्राउको विषयलाई राजनीतिक प्रतिशोध भनेर आन्दोलन गरिरहेको छ ।

प्रकाशित मिति: आइतबार, मंसिर ९, २०८१ १०:१२

प्रतिक्रिया दिनुहोस्