बीरगंज - भारतको आसाममा एउटा फेसबुक कमेन्टमा हाँसेको इमोजी प्रयोग गर्दा एक व्यक्ति कानुनी झमेलामा परेका छन् ।
ढेकियाजुलीका अमित चक्रवर्तीले कोकराझार जिल्लाका उप-आयुक्त वर्णली डेकाले मेकअप नलगाएको विषयमा गरिएको कमेन्टमा ‘हाहा’ रियाक्ट गरेका थिए । यही कारण उनले मुद्दा खेप्नु परेको हो ।
भारतीय सञ्चार माध्यम एनडीटिभीका अनुसार चक्रवर्तीलाई कोकराझार अदालतमा बोलाइएको थियो, जहाँ उनी २७३ किलोमिटर टाढाबाट पुगेका थिए ।
उप-आयुक्त डेकाले चक्रवर्तीसहित ‘नो मेकअप’ कमेन्ट गर्ने नरेश बरुवा र अब्दुलसुबुर चौधरीविरुद्ध पनि मुद्दा दायर गरेकी थिइन् । उनीहरू विरुद्ध साइबर स्टकिङ र यौन दुर्व्यवहारको आरोप लगाइएको छ ।
डेकाले फेसबुकमा अपलोड गरेको फोटोमा नरेश बरुवाले ‘नो मेकअप टुडे, म्याम’ कमेन्ट गरेका थिए । चक्रवर्तीले त्यसमा ‘हाहा’ रियाक्ट गरेका थिए । डेकाले बरुवाको कमेन्टमा कडा प्रतिक्रिया दिँदै ‘किन त्यो तिम्रो समस्या भयो ?’ भनेकी थिइन् । त्यसपछि उनले कोकराझार प्रहरी चौकीमा उजुरी दर्ता गराइन् ।
अदालतमा पेश गरिएका कागजातमा डेका र तीन अभियुक्तहरूबीचको पोस्ट आदानप्रदानको स्क्रिनसटहरू छन् ।
एउटा पोस्टमा उनले चौधरीलाई चेतावनी दिँदै भनेकी थिइन्, “कृपया भारतीय दण्ड संहिताको धारा ३५४ डी अन्तर्गत साइबर स्टकिङको बारेमा जान्नुहोस् । तपाईं दोषी हुनुहुन्छ र म साइबर सेलमा उजुरी दिँदैछु । तपाईंले मलाई फलो गर्नुभन्दा आफ्नो काममा ध्यान दिनुपर्थ्यो ।”
अर्को पोस्टमा (जसमा चक्रवर्तीलाई ट्याग गरिएको थियो) डेकाले लेखेकी थिइन्, “यो अपमानजनक र यौनिक रङ्ग दिइएको टिप्पणी हो । धारा ३५४ ए हेर्नुहोस् । म तपाईं विरुद्ध उजुरी दिँदैछु । तपाईं सहयोग गरेकोमा दोषी हुनुहुन्छ...।”
पत्रकारहरूसँग कुरा गर्दै चक्रवर्तीले भने, “मैले भर्खरै एउटा फेसबुक पोस्टमा प्रतिक्रिया दिएँ... र हाँसेको कारण, आज म जमानत लिन बाध्य छु । मलाई थाहा छैन वर्णली डेका आईएएस अधिकारी हुन् कि उप-आयुक्त हुन् ।” उनले २३ जनवरीमा कोकराझार प्रहरी चौकीका इन्चार्जले फोन गरेको बताए । “जब मैले ‘म बिना कारण किन आउने ?’ भनेर सोधेँ, त्यसपछि उनले मलाई भने, ‘तपाईं विरुद्ध मुद्दा दर्ता भएको छ’…”
"जब मैले विवरण मागें, उनले मलाई केही भनेनन् । त्यसपछि मेरा एकजना वकिल साथीले मलाई मुद्दाको बारेमा थप जान्न मद्दत गरे । यस्तो सानो कुरामा यति ठूलो कदम चाल्न आईएएस अधिकारीले कसरी समय पाए भन्ने कुरा म बुझ्दिनँ,” उनले भने ।
“फेसबुकमा हाहा रियाक्ट गरेकाले मलाई दुःख दिइएको छ । मैले नरेश बरुवाको पोस्टमा प्रतिक्रिया दिएँ... मलाई मुद्दाको बारेमा अरू केही याद छैन,” उनले थपे ।
-1740131587.jpg)
-1740131587.jpg)
-1739767801.jpg)
-1739521021-1739768970.jpg)
