वीरगञ्ज – भारतको ओडिशा राज्यस्थित कीट विश्वविद्यालयमा अध्ययनरत नेपाली छात्रा प्रकृति लम्सालको शंकास्पद मृत्यु को विरोधमा वीरगञ्जमा नेपाली विद्यार्थीहरूले मौन जुलुस निकालेका छन्।
न्यायको माग गर्दै शुक्रबार निकालिएको उक्त प्रदर्शनमा कीट विश्वविद्यालयबाट निष्कासित भएका झन्डै ५० भन्दा बढी विद्यार्थी सहभागी भएका थिए। उनीहरूलाई वीरगञ्जका विभिन्न निजी शैक्षिक संस्थाका विद्यार्थीहरूले पनि साथ दिएका थिए। विरोध स्वरूप विद्यार्थीहरूले हातमा कालो पट्टी बाँधेर र मुखमा कालो मास्क लगाएका थिए।
शंकास्पद मृत्यु र निष्कासनको विवाद
२० वर्षीय प्रकृति लम्साल फागुन ४ गते कीट विश्वविद्यालयको छात्रावासमा शंकास्पद अवस्थामा मृत फेला परेकी थिइन्। घटनालाई शंकास्पद ठान्दै नेपाली विद्यार्थीहरूले विश्वविद्यालय प्रशासनविरुद्ध आवाज उठाएपछि उनीहरूलाई दबाब दिने प्रयास गरिएको थियो। कयौँ नेपाली विद्यार्थीहरूलाई कलेजबाट निष्कासित गरियो, जसले थप आक्रोश पैदा गर्यो।
विद्यार्थीहरूमाथि भएको अन्यायको विरोध गर्दै उनीहरूले वीरगञ्जमा शान्तिपूर्ण प्रदर्शन गरेका हुन्। घण्टाघर चोकबाट सुरु भएको मौन जुलुस माईस्थान, आदर्शनगर, नगरपालिका चोक हुँदै जिल्ला प्रशासन कार्यालय पर्सासम्म पुगेको थियो।
विद्यार्थीहरूको माग
विद्यार्थीहरूले प्रमुख जिल्ला अधिकारी (सिडिओ) गणेश अर्याल र पर्साका प्रहरी प्रमुख (एसपी) गौतम मिश्रलाई ज्ञापन पत्र बुझाएका छन्। उनीहरूले विश्वविद्यालय प्रशासनको गैरजिम्मेवार रवैया र अन्यायपूर्ण कारबाही को कडा विरोध गर्दै प्रकृति लम्साललाई मानसिक र शारीरिक यातना दिएको आरोप लागेका व्यक्तिहरूलाई कानुनी दायरामा ल्याउन माग गरे।
त्यस्तै, उनीहरूले विश्वविद्यालय प्रशासनको गैरजिम्मेवार व्यवहारको विरोध गर्दै भविष्यमा यस्ता घटनाहरू नदोहोरिउन् भनेर कडा कदम चाल्न आग्रह गरे। कीट विश्वविद्यालय फर्किन चाहने नेपाली विद्यार्थीहरूको सुरक्षाको सुनिश्चितता, उनीहरूको शैक्षिक भविष्य सुरक्षित गर्ने प्रतिबद्धता, तथा एकेडेमिक प्रक्रियामा कुनै पक्षपात नहुने ग्यारेन्टी गरिनुपर्ने माग राखियो।
प्रशासनको प्रतिबद्धता
विद्यार्थीहरूको गम्भीर मागप्रति ऐक्यबद्धता जनाउँदै प्रमुख जिल्ला अधिकारी गणेश अर्यालले यस विषयलाई सम्बन्धित निकायमा पुर्याइने प्रतिबद्धता व्यक्त गरे। उनले विद्यार्थीहरूको न्यायको पक्षमा प्रशासन दृढ रहेको बताउँदै घटनाको छानबिन पारदर्शी रूपमा अघि बढाउन नेपाल सरकारबाट पहल गरिने आश्वासन दिए।
नेपाल-भारत शैक्षिक सम्बन्धमाथि असर
घटनाले नेपाली विद्यार्थीहरूको सुरक्षासँगै नेपाल–भारतबीचको शैक्षिक सम्बन्धमाथि पनि प्रश्न उठाएको छ। विद्यार्थीहरूले न्याय नपाएसम्म आन्दोलनलाई निरन्तरता दिने चेतावनी दिएका छन्, जसले नेपाल सरकारलाई थप कूटनीतिक पहल गर्न बाध्य बनाएको छ।
-1739521021-1739768970.jpg)
