सिम्रौनगढ -हरिया तरकारी सस्तो भएको कारण अहिले माछा व्यवसायीहरूले बन्दाकोबी माछालाई आहारको रूपमा खुवाउन थालेका छन् ।
सिम्रौनगढ, पचरौता नगरपालिकाको ५०औं बिघा खेतमा लगाइएको बन्दाकोबी अहिले माछाको आहार बनेको छ ।
बन्दाकोबी पुसको पहिलो सातादेखि सस्तो भएको हो र अहिले १० रुपैयाँ किलोमा बिक्री भइरहेको छ । हरिया तरकारी खेतीका लागि चर्चित सिम्रौनगढ, पचरौतामा यसपटक सयौं बिघामा बन्दाकोबीको खेती गरिएको छ ।
बन्दाकोबीको मूल्य सस्तो भएको र बिक्रीका लागि समस्या झेलिरहेका यहाँका किसानहरू माछा व्यवसायीहरूले खेतमा आएर बन्दाकोबी खरीद गर्न थालेपछि मख्ख परेका छन् ।
बजारसम्म लगेर सोही मूल्यमा बिक्री गर्दै आएका किसानहरूले खेतबाटै व्यापारीले बन्दाकोबी खरीद गरेर आफैंले टेम्पो, मिनी जीप आदिबाट लैजान थालेपछि खुशी भएका हुन् । बन्दाकोबीबाट बढी मुनाफा नभए पनि बिक्री सहज भएपछि उनीहरू खुशी भएका हुन् । माछाका लागि तोरीको खरी (पिना) दानाको रूपमा खुवाउने गरिन्छ ।
खरी पछिल्लो समयमा महँगो भएको छ । अहिले खरी प्रतिकिलो रु ५० पर्छ भने बन्दाकोबी रु १० मैं पाइने हुँदा माछा व्यवसायीहरूले बन्दाकोबीको प्रयोग शुरू गरेका हुन् । बारा जिल्लामा माछापालन गर्ने व्यवसायीहरू धेरै छन् ।
पोखरीमा पालिएका माछामध्ये सिल्वर ग्रास जातका माछाले हरिया तरकारी खाने गरेकोले अहिले सबैभन्दा सस्तो बन्दाकोबीको प्रयोग भएको एकजना माछापालक किसानले बताए ।
