पर्सा– नेपाल निजी तथा आवासीय विद्यालय संघ हिसान (HISSAN) पर्सा को नयाँ जिल्ला कार्यसमिति गठन गरिएको छ। बैठकमार्फत सर्वसम्मत निर्णय गर्दै नयाँ नेतृत्व चयन गरिएको हो।
नवगठित कार्यसमितिको अध्यक्षमा मुकेश प्रसाद गुप्ता चयन भएका छन् भने उपाध्यक्षमा श्री आलोक कुमार चौरसिया, सचिवमा श्री गुरु रौनियार, कोषाध्यक्षमा श्री हरिश्याम ठाकुर रहेका छन्। त्यस्तै, श्रीराम कुमार दास, संजय कुमार सिंह, मार्टिन मुक्तान र शनी कुमार कार्यसमितिका सदस्यका रूपमा चयन भएका छन्।
बैठकमा अन्य महत्वपूर्ण निर्णयहरू पनि गरिएका छन्। विशेषगरी वीरगंज महानगरपालिकाको शिक्षा समितिमा संगठनको प्रतिनिधि पठाउने निर्णय गरिएको छ। यसले जिल्लाको शिक्षाक्षेत्रमा हिसान को भूमिकालाई थप प्रभावकारी बनाउने विश्वास गरिएको छ।
बैठकमा थप प्रस्तावमाथि छलफल भए पनि केही निर्णय बाँकी रहेका कारण आगामी बैठकमा विस्तृत तयारीसहित पुनः पेश गरिने निर्णय गरिएको छ।
नवगठित कार्यसमितिलाई व्यवस्थापन र मार्गदर्शन गर्नका लागि तीनजना विज्ञको चयन गरिएको छ। ई. मनिष सिंह, डा. हरिशंकर साह, र डा. विनय श्रेष्ठ लाई मार्गनिर्देशकका रूपमा नियुक्त गरिएको छ।
नयाँ कार्यसमितिले जिल्लाको शिक्षाक्षेत्रलाई अझ व्यवस्थित र प्रभावकारी बनाउने लक्ष्य लिएको छ।
