वीरगन्ज – ग्लोबल मनी वीक २०२५ को अवसरमा आज वीरगन्जमा विभिन्न बैंक तथा वित्तीय संस्थाहरूले संयुक्त रूपमा र्याली आयोजना गरेका छन्। माइस्थान प्रांगणबाट सुरु भएको र्याली घण्टाघरसम्म पुगेपछि औपचारिक कार्यक्रमसहित सम्पन्न भएको थियो।
र्यालीमा कर्पोरेट डेभलपमेन्ट बैंक, सांग्रिला विकास बैंक, महालक्ष्मी विकास बैंक, मुक्तिनाथ विकास बैंक, गुहेश्वरी मर्चेन्ट बैंकिङ एण्ड फाइनान्स, सेन्ट्रल फाइनान्स, मञ्जुश्री फाइनान्स लगायतका बैंक तथा वित्तीय संस्थाहरूको सहभागिता रहेको थियो। कार्यक्रममा कर्पोरेट डेभलपमेन्ट बैंक लिमिटेडका प्रमुख कार्यकारी अधिकृत लालबहादुर थिङ को समेत उपस्थिति रहेको थियो।
ग्लोबल मनी वीकबारे जानकारी दिँदै प्रमुख कार्यकारी अधिकृत लालबहादुर थिङ र गुहेश्वरी मर्चेन्ट बैंकिङ एण्ड फाइनान्सका प्रदेश प्रमुख राजेश कुमार गुप्ता ले यो एक वार्षिक कार्यक्रम भएको बताए। यस कार्यक्रमले बालबालिका, युवा तथा व्यवसायिक समुदायलाई वित्तीय साक्षरताबारे शिक्षित गर्ने उद्देश्य राख्छ।
प्रत्येक वर्ष मार्च महिनामा मनाइने यो अभियानमा बचत, बजेट निर्माण, लगानी तथा ऋण व्यवस्थापन जस्ता महत्वपूर्ण वित्तीय विषयहरूमा कार्यशाला, विद्यालय कार्यक्रम र सामुदायिक कार्यक्रमहरू सञ्चालन गरिन्छ। यसको मुख्य उद्देश्य वित्तीय निर्णय क्षमताको विकास गर्दै दीर्घकालीन आर्थिक स्थिरता निर्माण गर्नु रहेको छ।
ग्लोबल मनी वीकले प्रत्येक वर्ष नयाँ विषयवस्तु समेट्दै वित्तीय समावेशीकरणलाई प्राथमिकता दिने नीति अवलम्बन गर्छ। यस वर्षको कार्यक्रमले वित्तीय साक्षरताको महत्त्वलाई अझ मजबुत बनाउने अपेक्षा गरिएको छ।
