रौतहट : माध्यमिक शिक्षा परीक्षा (एसइई) २०८१ लाई मर्यादित बनाउन प्रशासनले कडा कदम चाले पनि परीक्षामा अनियमितता रोक्न कठिन देखिएको छ। ३ दिनमा नै रौतहटका विभिन्न परीक्षा केन्द्रबाट १ हजार २३३ मोबाइल फोन र स्मार्टवाच बरामद भएको छ।
परीक्षाको पहिलो दिनमै कडा सुरक्षा जाँच गर्दा परीक्षार्थीहरुले चिट चोर्न प्रयोग गरेका ४२४ वटा मोबाइल बरामद भएका थिए।
विगत वर्षमा सामाजिक सञ्जाल तथा म्यासेजिङ एपहरु ह्वाट्सएप, मेसेन्जर, भाइबर आदिको प्रयोग गरी चिट आदानप्रदान गर्ने प्रवृत्ति मौलाएको देखिएकाले यस वर्ष सुरक्षाकर्मीलाई विशेष निगरानीमा परिचालन गरिएको थियो।
यमुनामाई गाउँपालिका–५ स्थित श्री यमुनामाई माध्यमिक विद्यालय, झुन्खुन्वा परीक्षा केन्द्रका एक परीक्षा निरीक्षक परीक्षार्थीहरुबाट रकम लिएर मोबाइल भित्र्याएको आरोपमा पक्राउ परेका छन्।
त्यस्तै, मौलापुर नगरपालिका–५ स्थित श्री लक्ष्मिनिया मावि, मौलापुर परीक्षा केन्द्रमा बाहिरबाट चिट ओसारपसारमा संलग्न एक व्यक्ति पक्राउ परेका छन्।
पक्राउ परेका दुवै जनालाई सम्मानित जिल्ला अदालतबाट म्याद लिएर अनुसन्धान अघि बढाइएको जिल्ला प्रहरी कार्यालय रौतहटले जनाएको छ।
परीक्षाको दोस्रो दिन थप ३४० मोबाइल फोन र २ वटा स्मार्टवाच बरामद भएको छ। परीक्षाका दौरान मोबाइल प्रयोग गरेर चिट चोर्ने प्रयास भएपछि प्रशासनले यी उपकरण नियन्त्रणमा लिएको हो।
साथै, परीक्षामा परीक्षार्थीलाई सहयोग गरेको अभियोगमा दुईजना गार्डलाई निलम्बन गरिएको छ। परीक्षा अवधिभर उनीहरुलाई निलम्बित गरिएको र यस्ता गतिविधिमा संलग्न जोसुकैलाई कानूनी कारबाही गरिने चेतावनी प्रशासनले दिएको छ।
हिजो परीक्षाको तेस्रो दिन पनि कडाइ कायमै राख्दा जिल्लाभरका विभिन्न परीक्षा केन्द्रहरुबाट ४६९ मोबाइल बरामद भएका थिए।
परीक्षार्थीहरुले आफ्नो शरीरमा मोबाइल लुकाईछिपाई परीक्षा हलभित्र प्रवेश गरेपछि जाँच गर्ने क्रममा ती मोबाइल बरामद भएको जिल्ला प्रहरी कार्यालय रौतहटले जनाएको छ।
परीक्षा निरीक्षकको रुपमा खटिएका केही व्यक्तिहरुले परीक्षार्थीहरुलाई चिट चोर्न सहयोग गरेको खुलेको छ। प्रश्नपत्रका उत्तर बोलेर लेख्न लगाउनमा संलग्न दुईजना गार्डलाई नियन्त्रणमा लिई अनुसन्धान अघि बढाइएको जिल्ला प्रहरी कार्यालय रौतहटका प्रहरी प्रवक्ता एवम् सूचना अधिकारी दिपककुमार रायले जानकारी दिए।
गएका वर्षहरुमा सामाजिक सञ्जालमार्फत चिट व्यापक बनेपछि यसपटक प्रशासनले निगरानी थप कडा पारेको छ।
