वीरगञ्ज – वीरगञ्जको प्रसिद्ध गहवा माई मन्दिरले चैते दसैँ अष्टिमीका दिन गहवा माईको निशानसहितको दोश्रो डोली यात्रा निकाल्ने जनाइएको छ। मन्दिर व्यवस्थापन समितिका अनुसार, यस वर्ष चैत २३ गते शनिवार अष्टिमीका दिन गहवा माईको अपराह्न ४ बजे डोली यात्रा सुरु हुनेछ।
मन्दिर व्यवस्थापन समितिका अध्यक्ष नरेन्द्र साह का अनुसार, चैत २३ गते दिउँसो २ बजे गहवा माईको डोली र निशानको विशेष पूजा गरिनेछ। त्यसपछि २ नम्बर रोड, बिर्ता मन्दिर, अलखीयामठ, महावीरस्थान, माईस्थान चोक हुँदै डोली यात्रा पुनः गहवा माई मन्दिरमा आएर समापन हुनेछ। डोली यात्रापछि साँझ मन्दिर अगाडि महाआरती समेत आयोजना गरिनेछ।
हजारौं भक्तजनको सहभागिता हुने अपेक्षा :-
गहवा माई मन्दिर वीरगञ्ज तथा मधेस प्रदेशकै आस्थाको केन्द्र हो। यस मन्दिरमा नेपाल र छिमेकी मुलुक भारतबाट समेत दैनिक दुई हजारभन्दा बढी भक्तजनहरू दर्शन गर्न आउने गरेका छन्। गत वर्षको डोली यात्रामा २५ हजार भक्तजन सहभागी भएका थिए भने यस वर्ष ५० हजार जत्ती श्रद्धांलुहरु सहभागी हुने अनुमान गरिएको समितिले जनाएको छ। भक्तजनहरूका लागि गहवा माईको तस्वीर अङ्कित निशान वितरण गरिनेछ। प्रति निशानको शुल्क ३ सय ५ रुपैयाँ तोकिएको छ। गत वर्ष आयोजित पहिलो डोली यात्रामा ६५० वटा निशान वितरण गरिएको थियो।
ऐतिहासिक एवं आकर्षक गहवा माई मन्दिर :-
मन्दिरका मूल पुरोहित राधेश्यामप्रसाद उपाध्याय का अनुसार, गहवा माई मन्दिरको स्थापना मिति यकिन नभए पनि यो सयौँ वर्ष पुरानो ऐतिहासिक मन्दिर हो। आकर्षक शैलीमा मार्बल प्रयोग गरी बनाइएको दुईतले मन्दिरमा गर्भगृहभित्र गहवा माईको मूर्तिसहित सातवटा देवीका पिण्ड राखिएका छन्। माथिल्लो तलामा चाँदीमा कुँदिएका सातवटा नाग देवीका पिण्ड छन्।
यस वर्षको चैते दसैँ डोली यात्रा भव्य र ऐतिहासिक बनाउन व्यापक तयारी गरिएको अध्यक्ष साहले जानकारी दिएका छन्। भक्तजनहरूको उत्साहका कारण वीरगञ्जमा धार्मिक तथा सांस्कृतिक माहोल अझ विशेष हुने अपेक्षा गरिएको छ।
