वीरगञ्ज । ठाकुरराम बहुमुखी क्याम्पस १६ वर्षपछि सम्पन्न भएको स्वतन्त्र विद्यार्थी युनियन (स्ववियु) निर्वाचनको मतगणना बुधवार दिउँसोदेखि पुनः सुरु भएको छ ।
मङ्गलवार जिल्ला प्रशासन कार्यालय पर्सामा जिल्ला सुरक्षा समिति र विद्यार्थी सङ्गठनहरूबिच भएको सहमतिपछि मतगणना सुचारु गरिएको हो । यद्यपि, मतगणना पुनः सुरु भए पनि केही सङ्गठनले असहमति जनाउँदै विरोध जारी राखेका छन् ।
पर्साका प्रमुख जिल्ला अधिकारी (सिडिओ) गणेश अर्यालले मतगणना सुचारु गर्न विद्यार्थी सङ्गठनहरूसँग सहमति भएको दाबी गरेका छन् ।
“बुधवार बिहान क्याम्पस प्रमुख, प्रमुख राजनीतिक दलका प्रतिनिधि, नेपाल पत्रकार महासङ्घ, बार एसोसिएसन, मानवअधिकार सङ्गठन र विद्यार्थी सङ्गठनका प्रतिनिधिहरूसँग बैठक बसेर दिउँसोदेखि मतगणना सुरु गरिएको छ,” उनले भने ।
मतगणना स्थलमा सिडिओ अर्यालसहित पर्सा प्रहरी प्रमुख प्रहरी उपरीक्षक (एसपी) गौतम मिश्र, सशस्त्र प्रहरी बल नम्बर १३ गणका गणपति प्रहरी उपरीक्षक राधेश्याम धिमाललगायत सुरक्षाकर्मी र प्रशासकीय अधिकारीहरूको बाक्लो उपस्थिति रहेको छ ।
मङ्गलवार जिल्ला प्रशासन कार्यालयमा बसेको बैठकले क्याम्पसमा नक्कली प्रमाणपत्र र कागजातका आधारमा भएको कथित फर्जी भर्नाको अनुसन्धान गर्न पाँच सदस्यीय छानबिन समिति गठन गरेपछि विद्यार्थीहरू पुनः मतगणना गर्न सहमत भएका हुन् ।
