वीरगंज - आजबाट चैत्र नवरात्र शुरू भएको छ। चैते दशैँ समेत भनिने यस पर्वमा दुर्गा भवानीको विशेष उपासना गरिन्छ । आश्विन शुक्ल पक्षमा पर्ने दशैँ अर्थात् बडादशैँ जति भव्यरुपमा नमनाइए पनि चैते दशैँमा देशभरका शक्तिपीठमा भक्तजनको भीड लाग्ने गर्छ ।
चैत्र शुक्ल प्रतिपदा अर्थात् चैत १७ गते आइतबार आजदेखि चैत्र नवरात्र शुरु भएको छ ।
हिन्दु धर्मावलम्बीले आजको आजको दिन देखि नवमी तिथि सम्म घरघरमा शक्तिको उपासना स्वरुप देवीको पूजाआजा गर्नुका साथै देवीभागवत, दुर्गा सप्तशती चण्डी, देवी स्तोत्रलगायत देवीको महिमा गाइएको ग्रन्थ पाठ गर्ने गर्छन । यसमा देवी भागवत र सप्तशतीको पाठलाइ विशेष महत्वपूर्ण मानिएको छ।
चैत्र शुक्ल अष्टमी र नवमीलाई भने देशभर विशेष रुपमा मनाउने गरिन्छ । अष्टमीलाई चैतेदशैँ र नवमीलाई रामनवमी पर्वका रुपमा मनाउने गरिएको हो । यस वर्ष चैत २३ गते शनिबार अष्टमी अर्थात चैते दशैं र २४ गते आइतबार रामनवमी पर्व परेको छ ।
वर्षमा चार नवरात्र पर्छन् । चैत, असार, आश्विन र माघ महीनाको शुक्ल पक्षमा नवरात्र पर्छ । चार नवरात्रमध्ये चैत्र र आश्विनका नवरात्रलाई विशेष रुपमा मनाउने गरिएको छ ।
आषाढ र माघका दुई नवरात्रमा भने साधना मात्र गरिन्छ । यी दुई नवरात्रलाई सुषुप्त दशैँ भन्ने गरिएको छ । चैत्र नवरात्र शुरु भएको अवसरमा आज बिहानैदेखि देशभरका शक्तिपीठमा भक्तजनको भीड लागेको छ ।
नवरात्रीको समयमा वीरगञ्जको गहवा माई, वीर्ता माई भूटन देवी माई, विन्दवासीनी माई, बाराको गढीमाई, हेटौडाको चुरीयामाई लगायत उपत्यकाका गुह्येश्वरी, जयबागेश्वरी, मैतीदेवी, नक्साल भगवती, भद्रकाली, शोभा भगवती, कालिकास्थान, बज्रयोगिनी, इन्द्रायणी, सुन्दरीमाई लगायत देशभरका शक्तिपीठमा भक्तजनको भीड लागेको छ ।
नवरात्रका अवसरमा शक्तिपीठमा गई पूजाआजा एवं दर्शन गरेमा शक्ति प्राप्त हुने विश्वास रहिआएको छ ।
चैत नवरात्रिको पहिलो दिन आज विशेष रूपमा माता शैलपुत्रीको पूजा आराधना गर्ने दिन 🌺🙏🏼
माता शैलपुत्री देवी दुर्गाको पहिलो स्वरूप मानिन्छिन्। शास्त्रअनुसार, हिमालय राजाको पुत्री भएकाले उहाँलाई शैलपुत्री भनिएको हो। देवी शैलपुत्रीलाई भक्तिपूर्वक पूजा गर्दा आत्मबल, धैर्य र सकारात्मक ऊर्जा प्राप्त हुने विश्वास गरिन्छ। नवरात्रिको पहिलो दिन भक्तहरूले घटस्थापना गरी घरघरमा दुर्गा सप्तशती पाठ, अखण्ड दीप प्रज्वलन र व्रत बस्ने परम्परा रहेकाे छ।
नवरात्रिको पहिलो दिन माता शैलपुत्रीको पूजा गर्दा विशेषगरी सेतो फूल र दुग्धजन्य पदार्थ चढाउने परम्परा रहेको छ। धार्मिक मान्यताअनुसार, शैलपुत्रीको उपासना गर्नाले मनोकामना पूर्ण हुने र जीवनमा शान्ति तथा स्थिरता प्राप्त हुन्छ।
नवरात्रिको नौ दिनसम्म विभिन्न स्वरूपहरूमा माता दुर्गाको आराधना गरिन्छ। भोलि नवरात्रिको दोस्रो दिन माता ब्रह्मचारिणीको पूजा गरिनेछ।
