सु–प्रसिद्ध एतिहासिक श्री गहवा माई मन्दिरको प्रागंणमा यहि चैत्र २४ गते सामुहिक ’महाआरती’ भव्य रुपमा हुने भएको छ । राम जन्मोत्सवको अवसरमा साँझ ६ बजे गहवामाईको प्रागंणमा सामुहिक ’महाआरती’ भव्य रुपमा हुन लागेको छ ।
श्री गहवा माई तीर्थ क्षेत्र विकास समितिले तेस्रो पटक महाआरतीको आयोजना गर्न लागेको पर्सा अनलाईनलाई जनाएको छ । पछिल्लो वर्षहरु भन्दा यस वर्ष अझ भिड बढ्न सक्ने समितिको अनुमान छ ।
जसकारण महाआरतिलाई भाब्यताका साथ सफल बनाउन श्री गहवा माई तीर्थ क्षेत्र विकास समितिले विशेष सुरक्षाका सामुहिक महाआरतीको आयोजना गर्न लागेको समितिका पप्पु गुप्ताले बताए ।
‘महाआरती’मा आसपासका जिल्ला लगायत सिमापारीका श्रद्धालुहरुको हजारौको सख्यामा भिड बढ्ने भएकाले यसलाई व्यवस्थित रुपमा सम्पन्न गर्नका कसरी अगाडी बढ्ने भन्ने बारेमा समितिले सुरु देखी नै छलफल गरिरहेको समितिका श्याम पोखरेलले बताए ।
महाआरतीमा सहभागी हुन भक्तजनसंग प्रवेश शुल्क लगायत अन्य कुनै प्रकारको साजसजावटको शुल्क नलिइने महासचिव गुप्ताले बताए । महाआरतीमा भक्तजनले घरबाट रामनवमीका दिन साँझ ६ बजे आरतिको सामग्रीहरु जस्तै पुजाको थाली, फुल, दियो तेल बत्ति लिएर मात्र सहभागी हुनु पर्ने छ । आरती सकिए लगत्तै साँझ ७ बजे महाप्रसाद वितरणको कार्यक्रम रहेको छ ।
गुप्ताका अनुसार महाआरतीको तयारीका लागी सबै खर्च इच्छुक दाताहरु तथा समितिका पदाधिकारीहरुले जुटाएका हुन् ।
‘महाआरती’मा वीरगञ्ज वासीलगायत टाढा–टाढाबाट स्वःस्फुर्तरूपमा भक्तजन सहभागी हुने गरेकाले यसले धार्मिक पर्यटन प्रवद्र्धन गर्ने ज्योतिष सम्राट पुरुषोत्तम दुबेले बताए । पछिल्लो वर्ष भएको पहिलो महाआरतीमा हजारौको सख्यामा पर्सा, बारा तथा छिमेकी देश भारत बिहारका रक्सौल लगायत आसपासका भक्तजन सहभागी भएको उनको भनाई छ ।
