जीतपुरसिमरा गोल्डकपको १४औँ संस्करण चैत २४ गतेदेखी सिमरामा हुने

खेलकुद

गृहपृष्ठ
खेलकुद

जीतपुरसिमरा गोल्डकप जीतपुरसिमरा गोल्डकपको १४औँ संस्करण चैत २४ गतेदेखी सिमरामा हुने

Parsa Online सोमबार, चैत १९, २०८०

जगदम्बा स्टिलको मुख्य प्रायोजनमा जीतपुरसिमरा गोल्डकपको १४औँ संस्करण २४ चैतदेखि सिमरामा हुने भएको छ ।

सिमरा रंगशालामा फ्लड लाइटमा आयोजना हुने प्रतियोगिताबारे आइतबार आयोजक नव जनजागृति युवा क्लबले पत्रकार सम्मेलन गरी जानकारी गराएको हो ।

प्रतियोगितामा ५ ए डिभिजन क्लब र ४ मोफसलका गरी १० टिमको सहभागिता रहनेछ । साविक विजेता चर्च ब्वाइज युनाइटेड, एपिएफ फुटबल क्लब, मच्छिन्द्र फुटबल क्लब, फ्रेन्डस क्लब, नेपाल एपिएफ क्लब, नेपाल पुलिस क्लब र त्रिभुवन आर्मी फुटबल क्लब सहभागी छन् । रिगल रिसोर्ट एन्फा मकवानपुर हेटौँडा, सल्हेश युवा क्लब सिरहा, वीरगन्ज युनाइटेड र आयोजक नव जनजागृति युवा क्लबले प्रतियोगितामा सहभागिता जनाउनेछन् ।

प्रतियोगिताको विजेताले उपाधिसहित १० लाख रुपैयाँ तथा दोस्रो हुने टोलीले पाँच लाख रुपैयाँ प्राप्त गर्नेछन् । प्रतियोगिताको सर्वोत्कृष्ट खेलाडीले मोटरसाइकल प्राप्त गर्नेछन् । यस्तै विधागततर्फ उत्कृष्ट खेलाडीले २० हजार रुपैयाँ पाउनेछन् । प्रत्येक खेलका म्यान अफ दी म्याचले १० हजार रुपैयाँ प्राप्त गर्ने आयोजक नव जनजागृति युवा क्लब सिमराको महासचिव सम्भु सिंह ठकुरीले पत्रकार सम्मेलनमा बताए ।

२४ चैतदेखि सुरु हुने प्रतियोगिता ३ वैशाखसम्म सिमरा रंगशालामा हुनेछ । प्रतियोगिताको लागि जीतपुरसिमरा उपमहानगरपालिकाले ३० लाख रुपैयाँ आर्थिक सहयोग गर्नेछ । प्रतियोगिताको उद्घाटन नेपाल सरकारको खेलकुद मन्त्री विराजभक्त श्रेष्ठले गर्नेछन् । प्रतियोगिताको अनुमानित लागत करिब १ करोड ३ लाख ७९ हजार ८ सय रहेको आयोजकले पत्रकार सम्मेलनमा जनाइएको छ ।

१४औँ जीतपुरसिमरा गोल्डकपमा विद्यार्थीहरूलाई परिचयपत्रको आधारमा ५० प्रतिशत टिकेटमा छुट गरिनेछ । अपांगता, अशक्त र ७० वर्षभन्दा माथिको वृद्धवृद्धालाई निःशुल्क प्रवेशको व्यवस्था मिलाइएको आयोजक क्लबका अध्यक्ष रामचन्द्र लामाले बताए । नव जनजागृति युवा क्लब सिमराका अध्यक्ष रामचन्द्र लामाको अध्यक्षतामा भएको पत्रकार सम्मेलनमा क्लबका पदाधिकारी तथा पत्रकारहरूको उपस्थिति रहेको थियो ।

प्रकाशित मिति: सोमबार, चैत १९, २०८० १०:५०

प्रतिक्रिया दिनुहोस्