चेन्नईविरुद्ध लखनउको शानदार जित

खेलकुद

गृहपृष्ठ
खेलकुद

चेन्नईविरुद्ध लखनउको शानदार जित

Parsa Online बुधबार, वैशाख १२, २०८१

इन्डियन प्रिमियर लिग (आईपिएल) अन्तर्गत गएराति भएको खेलमा लखनउ सुपर जायन्ट्सले चेन्नई सुपर किंग्समाथि ६ विकेटको जित निकालेको छ।

एमए चिदम्बरम स्टेडियममा टस हारेर सुरुमा ब्याटिङ गरेको चेन्नईले दिएको २११ रनको लक्ष्य लखनउले ३ बल बाँकी हुँदा चार विकेटको क्षतिमा २१३ रन बनाएर पूरा गरेको हो।

लखनउको जितका लागि मार्कस स्टोनिसले नटआउट शतकीय पारी खेले। उनले ६३ बलको सामना गर्दा १३ चौका र ६ छक्काको मद्दतमा सर्वाधिक १२४ रन बनाएका हुन्। लखनउका लागि निकोलस पुरन ३४, कप्तान केएल राहुल १६ र देवदत्त पडिक्कल १३ रनम आउट हुँदा दीपक हुड्डा १७ रनमा नटआउट रहे।

चेन्नईका माथिशा पाथिरानाले दुई विकेट हात पार्दा दीपक चाहर र मुस्तिफिजुर रहमानले एकएक विकेट मात्र लिए।

पहिला ब्याटिङ गरेको चेन्नईले निर्धारित २० ‌ओभरमा ४ विकेट गुमाउँदै २१० रन बनाएको थियो। लाखनउविरुद्ध चेन्नईका कप्तान ऋतुराज गायकवाडले बनाएको शतक खेर गयो। उनले नटआउट सर्वाधिक १०८ रन बनाएका थिए। ६० बल खेलेका उनले १२ चौका र ३ छक्का प्रहार गर्दै यो सिजनकै शानदार प्रदर्शन गरेका थिए।

चेन्नईका लागि शिवम दुबे ६६, रविन्द्र जडेजा १७ र डेरिल मिचेल ११ रनमा आउट हुँदा एक बल खेलेका महेन्द्रसिंह धोनी ४ रनमा नटआउट रहे।

चेन्नईलाई सस्तैमा समेट्न लखनउका लागि म्याट हेनरी, मोहसिन खान र यस ठाकुरले एकएक विकेट हात पारे।

मंगलबारको खेलमा विजयी भएसँगै लखनउ अंक तालिकाको चौथो स्थानमा उक्लिएको छ। आठ खेल खेल्दा उसले १० अंक जोडेको छ। साविक विजेता चेन्नाई भने समान खेलमा ८ अंक जोड्दै पाँचौं स्थानमा झरेको छ।

आईपिएल अन्तर्गत बुधबार दिल्ली क्यापिटल्स र गुजरात टाइटनको प्रतिस्पर्धा हुँदैछ। यो खेल साँझ ७:४५ बजे सुरु हुनेछ।

प्रकाशित मिति: बुधबार, वैशाख १२, २०८१ ०६:२१

प्रतिक्रिया दिनुहोस्